KUCHING: Perintah Besai netapka semaya madah, jalai alun ari Sibu ke Kapit deka tembu lalu ulih ditengah mensia mayuh dalam timpuh dua taun.
Bejaku ba pengerami Beserumpu Makai Lemai Ngintu Gawai Dayak 2013 ba sebengkah hotel ditu malam ensanus, Menteri Besai Datuk Seri Najib Tun Abdul Razak madah duit belanja sepenyampau RM400 juta deka diagih ungkup pengawa nya.
Ku Najib, agih belanja nya deka dikena ngelengkas pengawa ngaga jematan di Kanowit sereta pengawa ngaga jalai di Song ti pemanjai 33km ti tau endar nyadi penyambung ngagai Kapit.
“Ba penemuai aku ke Kapit sebedau tu sereta ditambah penusah bot ekpress karam bedau lama tu tadi, aku ngasai kereja tambah ngaga jalai Sibu ke Kapit patut dikelengkas.
“Pelaba aku Pelilih Kapit nyadi sebengkah kandang menua ti enda disambung enggau jalai alun ba dunya maya ke diatu. Duit agih RM400 juta ari perintah besai deka nentuka Kapit disambung enggau Sibu dalam timpuh dua taun ti deka datai,” ku iya.
Ngenang senentang jalai Kapit ke Belaga, Najib madah pansik ke silik patut diadu dulu sebedau netapka pemutus ba dini jalai patut digaga.
Ba pengerami nya mega, Najib mansutka penerang dia Majilis Keselamatan Negara deka meri RM500 ngagai tiap iku orang ti enggau penusah karam di Belaga lalu Yayasan Rakyat 1Malaysia mega deka meri RM500 mega.
“Ungkup mansa ke mati, kitai meri RM5,000 ngagai tiap ruang bilik. Tiga iku orang ti udah mantu nyelamat sida ke karam, kitai deka meri RM3,000 ngagai tiap iku sida iya ti nyadika basa ari perintah,”ku Najib.
Tajapan penusah nya bisi nabanka nyawa, Najib lantang ati ketegal penyampau mansa ke mati mimit enti dibandingka enggau 213 iku ke udah diselamat.
Ba penusah ke nyadi kena 28 Mei tu tadi, seiku disah mati lalu dua iku mengkang empai temu.
Ba penemuai Ngabang Gawai sehari ngagai Sarawak kena Hari Minggu tu tadi, Najib dulu ngabang ngagai Rh Wilson Begat anak Bakir di Penom, Ulu Paku muak ke pagi lalu udah nya ngejang ngabang ngagai Rumah George Chunggot di Nanga Nansang, Pakan.
Najib mega ngabang ngagai Rumah Jangit Lanting di Igu, Selangau iya nya rumah panjai Menteri ba Opis Kepala Menteri Datuk Joseph Entulu muak ke lemai.
Penemuai ngabang Najib mai berita manah ngagai rayat Sarawak lebih agi peranak menua pesisir ke alai iya (Najib) ngungkupka duit agih tambah sepenyampau RM30 juta dikena nyaup nembuka pengawa nyukat kelingi Tanah Adat Bansa Asal (NCR).
Najib ke mega Menteri Pekara Wang meri komitmen iya ngagai bansa asal Sarawak lalu deka meri agih tambah RM30 juta dalam bajet taun 2014 dikena nyukat kelingi tanah NCR ti urung 680,000 hektar pemesai di serata menua tu.
“Naka ke diatu, perintah udah ngagih RM60 juta ungkup pengawa sukat kelingi di Sarawak. Nadai dalam sejarah perintah besai kala ngeluarka belanja nyampau nya ungkup pengawa nyukat kelingi.
“Belanja tu dikemendar ketegal perintah mereti dia tanah NCR sigi semampai nyadi pesaka ti berega ngagai bansa asal Sarawak,”ku iya.
Bela datai ba pengerami nya Sapit Kepala Menteri Datuk Patinggi Tan Sri Alfred Jabu, Menteri Kanan Tan Sri Dr James Masing enggau Tan Sri William Mawan, Menteri Industri Pengawa Bekebun Bedandang Besai enggau Komoditi Dato Sri Douglas Uggah Embas, Speaker Dewan Undangan Nengeri Datuk Amar Mohamad Asfia Awang Nassar sereta menteri bukai.