NIAH: Sida ke diau ba Rumah John Abau enggau Rumah Patrick Libau, Sungai Tanggap Niah deka meda pemutus undi lebih manah agi ari Pengawa Bepilih Besai Nengeri (PRN) ke udah.
Kedua-dua tuai rumah nya mansutka penemu seduai iya ba rumah panajai diri empu di mua Penulung Menteri Indu, Ruang Bilik enggau Pemansang Nembiak Mit Datuk Rosey Yunus, Hari Tiga ke udah.
Ku Tuai Rumah John Abau, iya udah madah ngagai bala anembiak iya ngambika terus meri sukung enda bebagi ngagai Datuk Rosey maya hari muai undi kena 18 Disember.
Ku iya, Datuk Rosey nya seiku orang ke komited maya ngatur pengawa sereta orang ke ngempu kerusi Kunsil Nengeri (DUN) Bekenu sereta mayuh amat udah mai pemansang ngagai kandang menua ke dipegai iya.
“Kami tetap meri sukung ngagai Gabungan Parti Sarawak (GPS) enggau chalun iya Datuk Rosey maya Pengawa Bepilih Besai Ke-12 tu.
“Endang sigi bisi parti bukai nguji tama ngagai kandang tu lalu kami sigi enggau naka ulih nentuka pemutus lebih manah agi ari PRN-11 ke udah dikena nentuka pemansang ba kandang Sungai Tanggap,” ku iya.
Tuai Rumah Patrick Libau ti mega raban Parti Demokratik Progresif (PDP) Bekenu sama bela madahka diri sigi endang meri sukung enda bebagi ngagai chalun GPS.
“Kami sama dalam GPS lalu nya kebuah kami patut ngatur lebih mayuh agi pengawa dikena nentuka pemutus ke lebih manah agi ari iya ke udah.
“Ngagai sida ke nadai agi enggau kami dalam komponen parti sereta udah lari maya PRN ke udah, minta sida iya pulai baru laban ulih mai pemanah ngaga rayat ba kandang Sungai Tanggap,” ku iya.
Utusan Sarawak mega bisi dipadahka kandang Sungai Tanggap nya siti palan endur muai undi ke semina disediaka ngagai dua buah rumah panjai nya aja.
