Gabungan Parti Sarawak (GPS) nyemetak madahka deka terus begulai enggau Perintah Penyerakup sereta terus bejalaika pengawa dalam ngangkat enggau ngemansangka menua tu.
Chairman iya, Datuk Patinggi Tan Sri Abang Johari Tun Openg madah, taja ba pugu iya sida semina ngemeratka Sarawak tang enda ninggalka Kunstitusyen Perintah Besai enggau Sempekat Malaysia 1963 (MA63) sereta Komiti Antara Perintah (IGC).
Berebak enggau nya, ku iya, GPS mega deka meda perintah ke tegap ba renggat Perintah Besai.
“Nya alai (runding) kami ba Sarawak (iya nya) kitai deka siti perintah ke tegap, ti patut nyaran ngagai pengawa ngangkatka Malaysia ba tikas dunya,” ku iya.
Iya madah munyi nya maya Konvensyen Nasional Perintah Penyerakup 2023, ba Palan Dagang Dunya, Kuala Lumpur ti dipancharka terus nengah televisyen lemai tadi.
Konvensyen nya dipenyadika Menteri Besai, Datuk Seri Anwar Ibrahim sereta bela digulu raban ketuai 19 parti politik ke enggau numbuhka Perintah Penyerakup.
Berebak enggau nya, Abang Johari madah, GPS mega nitih enggau bebasaka gerah Yang di-Pertuan Agong, Al-Sultan Abdullah Ri’ayatuddin Al-Mustafa Billah Shah ti merambu numbuhka Perintah Penyerakup.
“Kitai mega deka meri komitmen ngagai Menteri Besai, Datuk Seri Anwar Ibrahim dalam ngatur enggau ngiring menua tu,” ku iya.
