MARUDI: Penulung Menteri Perintah Pelilih Menua, Datuk Penguang anak Manggil ngatur penemuai iya ngagai mayuh bengkah rumah panjai laban deka meratika mayuh bengkah projek ke benung dikemujurka.
Maya penemuai ngagai Rumah Jinggau anak Lubang Bukit Limau B, Bakong empai lama ke udah, Penguang ngasaika diri puas ati meda mayuh amat ubah ba rumah panjai nya berengkah ari iya nyadi pengari rayat N.76 Marudi.
Ku Penguang, sebedau iya nyadi pengari rayat nadai jalai meruan dikena ngelawa ngagai rumah panjai nya, ke semina jalai tanah luchah sereta mit amat.
Kandang ba mua rumah panjai nya agi dulu suba semina babas sereta luchak enti dibandingka enggau diatu, ku iya lebuh ngatur penemuai ngagai endur nya.
“Diatu jalai ngelawa ngagai endur nya sereta kandang mua rumah panjai nya mega udah ditar enggau manah ngena agih Projek Rayat,” ku iya.
Ketegal nya ku Penguang ti mega orang ngempu kerusi Kunsil Nengeri (DUN) Marudi lalu deka nyadi chalun Gabungan Parti Sarawak (GPS) maya Pengawa Bepilih Besai Nengeri Ke-12 (PRN-12), gaya rumah panjai nya nyau majak manah pengudah diaduka baru ngena Projek Mit Menua Pesisir (MRP) enggau Projek Ngemanahka Rumah Seranta Sarawak (PPRMS).
Ku iya, enda lama agi peranak rumah panjai nya deka ngasaika bekal ai beresi ngena Projek Rayat, Opis Bekal Ai Menua Pesisir (JBALB) ke benung dikemujurka.
Iya mega madahka, taja pan bisi sekeda orang enda setuju enggau pengawa ke digaga iya, tang iya sigi pechaya peranak rumah panjai ngagsaika pengaga ati ngagai pemansang ke udah dikemujuraka ba endur nya.
Iya meri terima kasih ngagai semua orang ke sama bela bisi enggau nyediaka perengkaguna sepemanjai timpuh iya nyadi pengari rayat.
Kelimpah ari nya Penguang mega nemuai ngagai taba endur ngagai Rumah Lingga anak Jinggan, Bukit Nat Bakong ke baru.
Maya penemuai iya ngagai endur nya Penguang ngasaika diri puas ati laban jalai dikena ngelawa rumah panjai nya udah ditar ngena i Projek Rakyat N.76 sereta ngarapka pengawa ngaga rumah panjai baru nya diatur enggau manah.
Lebuh nemuai ngagai Rumah Budin anak Nawek, Sg Tuyut maya hari ke sama iya sempat nyuaka chek MRP penyampau RM5,000 ngagai Biro Indu rumah panjai nya.
Maya berandau enggau peranak rumah panjai nya Penguang madahka Projek Bekal Eletrik Menua Pesisir RES Renggat 1 ba endur nya benung dikemujurka sereta jalai ngelawa ngagai runmah panjai nya mega benung diaduka ngena Projek Rakyat N76. – UtusanSarawak
