KUCHING: Gabungan Parti Sarawak (GPS) mantaika 24 iku orang baru sereta ngetanka 58 iku penyandang kerusi ba Pengawa Bepilih Nengeri Sarawak Ke-12 (PRN 12).
Rintai nama chalun Gabungan Parti Sarawak (GPS) dibantaika chairman iya Datuk Patinggi Tan Sri Abang Johari Tun Openg ba aum pengarang berita pengudah nyuaka Surat Chiri Nyadi Chalun ti diatur ba Indu Opis PBB ditu kemari.
Iya mantaika semua nama chalun ari empat parti komponen GPS ti nyengkaum Parti Pesaka Bumiputera Bersatu (PBB), Parti Rakyat Bersatu Sarawak (SUPP), Parti Demokratik Progresif (PDP) enggau Parti Rakyat Sarawak (PRS).
Abang Johari madah, GPS bediri minta pilih ba 82 sitak DUN lalu iya pechaya chalun nya orang ti bepeneleba sereta ulih bejalaika pengawa nyadi pengari rayat ba sitak ke diari.
Iya madahka semua chalun GPS deka bediri minta pilih, nyadi tim iya nya ngena tikit GPS.
“Kitai (GPS) bisi 24 iku orang baru ti beumur entara 30-an ngagai 40-an, laban kitai arap amat sida tu deka sama dilatih sereta diiri penemu sentang politik Sarawak.
“Politik Sarawak, kitai bisi rayat pupu bansa, jalai pengarap enggau budaya.
“Landskap politik Sarawak semina orang Sarawak ke nemu. Nya alai rambai jaku kitai sekali tu (PRN 12) ‘Sarawak First’,” ku iya ti penyandang DUN Satok dipelaba nyadi chalun ba DUN Gedong.
Ngenang chalun baru sereta biak, iya pechaya chalun biak tu bisi chara kediri empu, nya kebuah bisi chalun beumur 30-an.
Nambahka nya, manifesto PRN 12 deka dibantaika kena 8 Disember 2021.
Entara chalun baru ti dibantaika GPS, ba DUN Tanjong Datu, PBB diarika anak Niang Pehin Sri Adenan Satem, iya nya Azizul Annuar Adenan nyilih indai iya Datuk Amar Jamilah Anu ti nyurutka diri ari ngetanka penuduk tu.
Nicholas Kudi Jantai Maseng iya nya anak menyadi niang Tan Sri Datuk Amar James Jemut Masing, bediri minta pilih ba DUN Baleh nyilih Masing, ngetanka sitak tu.
Presiden Parti Demokratik Progresif (PDP) Dato Sri Tiong King Sing deka bediri ba Dun Dudong.
Dayang Noorazah Awang Sohor bediri minta pilih ba DUN Lingga, nyilih Datuk Simoi Peri ti enda agi ngetanka penuduk tu.
Kelimpah ari nya, Billy Sujang (Dun Opar), Mohamad Duri (DUN Kalaka), Friday Belik (DUN Krian), Datuk Wee Hong Seng (DUN Padungan) enggau ke bukai.
